संभाजी ब्रिगेडचे प्रदेशाध्यक्ष प्रवीण गायकवाड यांच्यावर झालेल्या शाईफेकीच्या घटनेनंतर पुढील भूमिका ठरवण्यासाठी सोलापूरच्या शासकीय विश्रामगृहात मराठा समाजाची महत्त्वपूर्ण बैठक पार पडली. जिल्ह्यातील सर्व तालुक्यांतील समन्वयक आणि कार्यकर्ते मोठ्या संख्येने या बैठकीसाठी जमले होते. या बैठकीस अक्कलकोट येथील श्री स्वामी समर्थ अन्नछत्र मंडळाचे संस्थापक जन्मजेयराजे भोसले हे देखील आपल्या समर्थकांसह उपस्थित होते. बैठकीदरम्यान पंढरपूरहून आलेल्या ऍड. रोहित फावडे यांनी मनोगत व्यक्त करताना जन्मजेयराजे भोसले यांचा ऐकरी उल्लेख केला आणि प्रवीण गायकवाड यांच्यावर हल्ला करणाऱ्या दीपक काटे याच्या कानात "अमोलराजे भोसले काय म्हणाले?" असा सवाल उपस्थित केला.

यामुळे उपस्थित भोसले बंधूंचे समर्थक संतप्त झाले आणि त्यांनी रोहित फावडे यांच्यावर जोरदार हल्ला चढवला. बैठकीत अचानक गोंधळाची परिस्थिती निर्माण झाली. समन्वयकांनी वातावरण शांत करण्याचा प्रयत्न केला, मात्र प्रकरण हाताबाहेर गेले.