राष्ट्रवादीचे आमदार माणिकराव कोकाटे यांना हायकोर्टाने जामीन मंजूर केल्याने त्यांची अटक टळली आहे. मात्र त्यांची शिक्षा कायम असल्याने आमदारकीवर टांगती तलवार कायम आहे. आजच्या सुनावणीमध्ये जर माणिकराव कोकाटे यांना दिलासा मिळाला असता तर त्यांची आमदारकी देखील त्यांची वाचू शकली असती. आता या प्रकरणात विधानसभा अध्यक्ष राहुल नार्वेकर काय भूमिका घेतात, हे पाहणे महत्त्वाचे ठरणार आहे. कोर्टाच्या निकालाची प्रत विधीमंडळाला प्राप्त झाल्यानंतरच अध्यक्ष यावर निर्णय घेतील, अशी माहिती समोर आली आहे. कोकाटेंना दिलासा मिळाला असला तरी तांत्रिकदृष्ट्या त्यांची आमदारकी धोक्यात असल्याचे कायदेतज्ज्ञांचे मत आहे. यामुळे विधानसभा अध्यक्ष राहुल नार्वेकर यांच्या निर्णयाकडे लक्ष लागले आहे.