मंत्रिमंडळात स्थान न मिळाल्यामुळे माजी उपमुख्यमंत्री आणि राष्ट्रवादी काँग्रेसचे दिग्गज नेते छगन भुजबळ नाराज आहेत. भुजबळांनी आपली नाराजी व्यक्त केली होती. भुजबळांची नाराजी दूर केली जाईल, असे राष्ट्रवादी काँग्रेसकडून सांगण्यात आले होते. पण आता छगन भुजबळ यांच्याविरोधात अजित पवार यांनी नवी खेळी केल्याची जोरदार चर्चा होत आहे. अजित पवार यांनी माणिकराव कोकाटे यांना बळ दिलेय.

छगन भुजबळ यांच्या नाराजीचा फटका बसू नये म्हणून अजित पवार यांनी माणिकराव कोकाटे यांना बळ दिलेय. सिन्नरचे आमदार माणिकराव कोकाटे यांच्याकडे अजित पवार यांनी कृषी मंत्रालयाची धुरा सोपवली आहे. कृषी मंत्रालय मिळाल्यानंतर माणिकराव कोकाटे हे येवल्याच्या दौऱ्यावर आहेत. अजित पवार यांनी टाकलेल्या या डावाची राजकीय चर्चा होत आहे.

माणिकराव कोकाटे आणि छगन भुजबळ यांचं राजकीय वैर नाशिककरांना चांगलेच माहित आहे. भुजबळ यांना उघड विरोध करणारा नेता म्हणून माणिकराव कोकाटे यांची ओळख आहे. मंत्री झाल्यानंतर कोकाटे यांचा पहिला दौरा येवला असेल. त्यामुळे राष्ट्रवादीच्या दोन नेत्यांमधील वादाची पुन्हा एकदा चर्चा होणार आहे.