दादरमधील कबुतरखाना पुन्हा सुरू करण्यासाठी पडद्यामागून हालचाली सुरू झाल्याची माहिती समोर आली आहे. भाजपचे नेते आणि मंत्री मंगल प्रभात लोढा यांनी मनसे अध्यक्ष राज ठाकरे यांची भेट घेतली. दादर येथील राज ठाकरे यांच्या शिवतीर्थ या निवासस्थांनी मंगळवारी पाच ते साडेपाचच्या दरम्यान ही भेट झाली. या भेटीदरम्यान दोन्ही नेत्यांमध्ये दादर येथील कबुतरखान्यावर चर्चा झाल्याची माहिती समोर आली आहे. याबाबत काही तरी सकारात्मक चर्चा झाल्याचा अंदाज वर्तवला जात आहे. दरम्यान, दादर येथील कबुतरखाना मुंबई हायकोर्टाच्या आदेशानंतर मुंबई महानगर पालिकेकडून बंद करण्यात आला होता. कबुतरखाना बंद करण्यास जैन समाजाकडून विरोध करण्यात आला होता. यासाठी दादरमध्ये आंदोलन देखील करण्यात आले होते.