राज्यातील मुख्यमंत्रिपदासाठी दोन फॉर्म्युले ठरवण्यात आले आहेत. यात अडीच - अडीच वर्षाचा पहिला फॉर्म्युला आहे. तर दोन- दोन - एक असा दूसरा फॉर्म्युला असल्याची माहिती सूत्रांकडून देण्यात आली आहे. यावर अंतिम निर्णय हा दिल्लीत होणाऱ्या बैठकीत घेतला जाणार आहे.

राज्यात विधानसभा निवडणुकीचे निकाल जाहीर झाले आहेत. त्यानंतर महायुतीचं सरकार स्थापन होणार असल्याचं निश्चित होताच आता राज्याचा मुख्यमंत्री कोण असणार याकडे सगळ्यांचं लक्ष लागलं आहे. दरम्यान, एकीकडे फडणवीस आणि एकनाथ शिंदे यांच्या नावाला मुख्यमंत्री म्हणून पसंती मिळत आहे. तर दुसरीकडे महायुतीकडून मुख्यमंत्रिपदासाठी दोन फॉर्म्युले ठरवण्यात आले आहेत. यावर अंतिम निर्णय घेण्यासाठी तिन्ही मंत्री दिल्लीत जाणार असून तेथे पंतप्रधान नरेंद्र मोदी आणि गृहमंत्री अमित शहा यांच्या उपस्थितीत पुढील भूमिका ठरवण्यात येणार आहे. यासंदर्भातील माहिती सूत्रांनी दिली आहे.

पहिला फॉर्म्युला अडीच - अडीच वर्षाचा आहे. यात पहिले अडीच वर्ष देवेंद्र फडणवीस तर पुढचे अडीच वर्ष एकनाथ शिंदे हे मुख्यमंत्री असतील, असं सूत्रांनी सांगितलं आहे. तर दुसऱ्या फॉर्म्युल्यात फडणवीस हे दोन वर्ष, नंतर एकनाथ शिंदे हे दोन वर्ष आणि त्यानंतर अजित पवार हे एक वर्ष मुख्यमंत्री असतील असं सूत्रांकडून सांगण्यात आलं आहे.

Edited By Rakhi Rajput