राज्यातील विधानपरिषदेच्या निवडणुकीसाठी सर्व राजकीय पक्षांनी जय्यत तयारी केली आहे. काल भाजपने उमेदवार जाहीर केले. त्यानंतर आज बुधवारी ठाकरे गटाने अंबादास दानवे यांना उमेदवारी जाहीर केली. परंतु शरद पवार गट आणि काँग्रेस हे विधानपरिषदेत उद्धव ठाकरे यांच्या उमेदवारीसाठी आग्रही होते. परंतु आज ठाकरे गटाने थेट अंबादास दानवे यांना उमेदवारी जाहीर केल्याने महाविकास आघाडीत फूट पडल्याचे चित्र दिसत आहे. महाविकास आघाडीत ठाकरे गटानंतर आता काँग्रेसही उमेदवार देणार असल्याचे हर्षवर्धन सपकाळ यांनी जाहीर केले. त्यामुळे महाविकास आघाडीला एक उमेदवार निवडून आणणे आव्हानात्मक असणार आहे. दुसरीकडे अंबादास दानवे यांना उमेदवारी जाहीर केल्यानंतर सुषमा अंधारे यांची पहिली प्रतिक्रिया समोर आली आहे. सुषमा अंधारे यांनी उद्धव ठाकरेंसोबतचा व्हिडिओ स्टेटसला ठेवून आमदारकी, खासदारकी १०० वेळा कुर्बान असं कॅप्शन लिहिलंय.