विधानसभेसाठी बंडखोरी केलेल्या उमेदवारांचं बंड थंड करण्यासाठी महाविकास आघाडीकडून प्रयत्न सुरू आहेत. विधानपरिषदेची आमदारकी देतो किंवा महामंडळावर पद देतो, मात्र अर्ज मागे घ्या, असं आश्वासन मविआकडून बंडखोरांना देण्यात येत आहे, अशी माहिती सूत्रांकडून देण्यात आली आहे.

विधानसभा निवडणुकीच्या रणधुमाळीत उमेदवारी न मिळाल्याने बंडखोरी करत उमेदवारी अर्ज दाखल करणाऱ्या नाराजांची संख्या सध्या वाढली आहे. अशा नाराज बंडखोरांची नाराजी दूर करण्यासाठी प्रयत्न सुरू आहेत. महाविकास आघाडीत अशा नाराज बंडखोरांना उमेदवारी अर्ज मागे घेण्यासाठी सरकार आल्यावर विधानपरिषदेतील शिल्लक ५ जागेवर आमदारकी देण्याचं आश्वासन दिलं जात आहे. त्याचबरोबर महामंडळावर देखील पद देण्याबद्दल सांगितलं जात असून अर्ज मागे घेण्यासाठी सर्वतोपरी प्रयत्न मविआकडून केले जात असल्याचं सूत्रांकडून सांगण्यात आलं आहे. कॉंग्रेसच्या बंडखोरांना शांत करण्याचे प्रयत्न रमेश चेन्नीथला, अशोक गहलोत हे करत आहेत. तर राष्ट्रवादीमधील बंडखोर उमेदवारांची समजूत स्वत: शरद पवार, जयंत पाटील आणि सुप्रिया सुळे यांच्याकडून काढली जात असल्याच सूत्रांनी सांगितलं आहे. उद्धव ठाकरे गटाकडून संजय राऊत बंडखोरी थांबवण्यासाठी प्रयत्न करत आहेत. मविआच्या या प्रयत्नाना आता किती यश येईल हे पाहाणं महत्वाचं ठरणार आहे.

Edited By Rakhi Rajput