एसटी महामंडळात एकाच मुख्यालय तीन वर्षांपेक्षा जास्त काळ असलेल्या अधिकाऱ्यांचे तातडीने इतर ठिकाणी बदली करा असे निर्देश परिवहन मंत्री प्रताप सरनाईक यांनी एसटी महामंडळ प्रशासनाला दिले आहेत. आमदार गोपीचंद पडळकर व आमदार सदाभाऊ खोत यांच्या नेतृत्वाखाली एसटी कर्मचाऱ्यांच्या समस्यांबाबत आणि प्रश्नांसंदर्भात बोलवलेल्या बैठकीत त्यांनी हे निर्देश दिले आहेत. अनेक वर्षांपासून एसटी विभागातील अनेक अधिकारी हे एकाच मुख्यालयात ठाण मांडून बसले आहेत. त्यामुळे त्यांचे काही ठराविक कर्मचाऱ्यांशी जवळचे संबंध झाले आहेत. त्यातून ते इतर सर्वसामान्य कर्मचाऱ्यांवर अन्याय करतात. याचा परिणाम एसटी प्रशासनाच्या कामावर होत आहे. त्यामुळे इथून पुढे आता एकाच मुख्यालयात कोणताही अधिकारी तीन वर्षापेक्षा जास्त काळ आपला कार्यकाळ करू शकणार नाही, अशी माहिती परिवहन मंत्री प्रताप सरनाईक यांनी दिली आहे.