तबरेज शेख, साम टीव्ही

महाराष्ट्रात ठाकरे बंधू एकत्र येण्याच्या चर्चा सुरू असताना नाशिकमध्ये मनसेच्या कार्यालयात सत्यनारायण पूजेला ठाकरे गटाच्या जिल्हाप्रमुख आणि कार्यकर्त्यांनी उपस्थिती लावली आहे. यामुळे सर्वांच्याच राजकीय भुवया उंचवल्या आहेत.

नाशिकच्या ठक्कर बाजार येथे मनसेचे मध्यवर्ती कार्यालय आहे. काही दिवसांपासून या कार्यालयाचे नूतनीकरणाचे काम चालू होते. हे काम पूर्ण झाल्यावर आज याच कार्यालयात नवचडी आणि सत्यनारायण पूजेचे आयोजन केले आहे. या ठिकाणी नाशिकच्या ठाकरे गटाचे जिल्हाप्रमुख डी.जी. सूर्यवंशी यांच्यासह अनेक पदाधिकारी हे राज आणि उद्धव ठाकरे यांची फोटो फ्रेम घेऊन तेथे आले. यामुळे काही दिवसांनी वेगळे राजकीय चित्र पाहायला मिळणार असल्याची चर्चा रंगू लागली आहे.