पुणे : कोल्हापूर येथील चंदगडनंतर आता पुणे जिल्ह्यातील जेजुरी नगरपरिषदेतही दोन्ही राष्ट्रवादी काँग्रेस पक्ष एकत्र लढण्याची शक्यता व्यक्त केली जात आहे. जेजुरी नगरपरिषदेत सध्या या दोन्ही गटांमध्ये एकत्र येण्यासाठी चर्चा सुरू असल्याची माहिती सूत्रांनी दिली आहे.

जेजुरी नगरपरिषदेत एकूण २० जागा आणि एक नगराध्यक्ष पद आहे. यापूर्वी या नगरपरिषदेत माजी आमदार संजय जगताप यांच्या गटाचे वर्चस्व होते. तेव्हा संजय जगताप काँग्रेसमध्ये होते. मात्र सध्या ते भाजपमध्ये दाखल झाले आहेत. गेल्या निवडणुकीत संजय जगताप गटाने विजय मिळवला होता, तर त्यावेळी त्यांचा सामना माजी आमदार विजय शिवतारे यांच्याशी झाला होता. त्यानंतरच्या काळात राजकीय गणितात मोठे बदल झाले असून त्यामुळे जेजुरी नगरपरिषद निवडणुकीकडे सर्वांचे लक्ष लागले आहे. दरम्यान, विजय शिवतारे यांनी अजित पवार गटाला जेजुरी नगरपरिषदेत एकत्रित लढण्याचा प्रस्ताव दिला असल्याची माहिती मिळते. त्यामुळे आता दोन्ही राष्ट्रवादी गट एकत्र येऊन ही निवडणूक लढवण्याची शक्यता प्रबळ मानली जात आहे.