राज्य सरकारच्या अखत्यारितील विविध महामंडळांचे अध्यक्ष व सदस्य पदांच्या नियुक्त्या स्थानिक स्वराज्य संस्थांच्या निवडणुकांनंतरच करण्यात येणार असल्याचं स्पष्ट मत महसूलमंत्री चंद्रशेखर बावनकुळे यांनी व्यक्त केलं आहे. वर्ध्यात भाजपच्या विदर्भस्तरीय मेळाव्यात बोलताना त्यांनी हा खुलासा केला. मागील काही महिन्यांपासून या पदांसाठी अनेक इच्छुकांची चर्चा सुरू होती. मात्र, निवडणुकांपूर्वी कोणत्याही नियुक्त्या होणार नसल्याने इच्छुकांना तूर्त निराशा सहन करावी लागणार आहे.

सर्वोच्च न्यायालयाने राज्य सरकारला चार महिन्यांत स्थानिक स्वराज्य संस्था निवडणुका घेण्याचे आदेश दिले आहेत. त्यानुसार महापालिका, नगरपरिषदा, जिल्हा परिषद यांसारख्या निवडणुका लवकरच जाहीर होण्याची शक्यता आहे. महत्त्वाच्या १४० महामंडळांवर भाजपच्या ७८५ नेते, कार्यकत्यांची नियुक्ती केली जाणार आहे. बावनकुळे यांनी यावेळी महायुतीच्या माध्यमातूनच आगामी निवडणुका लढवल्या जातील, असंही स्पष्ट केलं. त्यामुळे नियुक्त्यांच्या संदर्भातील अंतिम निर्णय या निवडणुकांनंतरच अपेक्षित आहे.