सरकारने दिलेल्या जीआरनुसार कुणबी जात प्रमाणपत्राच्या अर्जांची सखोल चौकशी करूनच प्रमाणपत्र देण्याच्या सूचना दिल्या आहेत. संबंधित समिती आणि सक्षम प्राधिकरणांकडून तपासणी झाल्यानंतरच प्रमाणपत्र मंजूर होणार आहे. मात्र, या प्रक्रियेत मराठवाड्यातील तहसीलदारांनी विशेष दक्षता घेण्याची गरज असल्याचे अधोरेखित करण्यात आले आहे. कुणबी प्रमाणपत्र देताना कुठेही शिथिलता दाखवू नये, अन्यथा कठोर कारवाई होईल असा इशारा देण्यात आला आहे. शासनादेशाबाहेर कुणालाही प्रमाणपत्र दिल्यास संबंधित अधिकाऱ्यांची चौकशी करून त्यांच्यावर शिस्तभंगाची कारवाई होणार असल्याचेही स्पष्ट करण्यात आले आहे. त्यामुळे तहसीलदारांना डोळ्यात तेल घालून काम करण्याचे आदेश देण्यात आले आहेत.