पुणे शहरात सोमवारी रात्री मराठा आणि ओबीसी आंदोलकांमध्ये मोठा राडा झाला. लक्ष्मण हाके यांनी मद्यपान केल्याचा आरोप करत मराठा आंदोलकांनी त्यांना घेरलं. त्यांची तातडीने अल्कोहोल टेस्ट करा, अशी मागणी देखील काही जणांनी केली. यावेळी हाके यांनी आपल्याला दारू पिऊन शिवीगाळ केल्याचा आरोप काही जणांनी केला. भररस्त्यात सुरु असलेला या राड्याची माहिती पोलिसांना मिळाली.

कोंढवा पोलिसांनी तातडीने घटनास्थळी धाव घेत मध्यस्थी करत वाद मिटवला. दरम्यान, लक्ष्मण हाके यांची पुण्यातील ससून रुग्णालयात वैद्यकीय चाचणी करण्यात आली. प्राथमिक अहवालात हाके यांनी दारु पिलेली नव्हती, असा निष्कर्ष डॉक्टरांनी काढला.

आणखी खात्री करण्यासाठी लक्ष्मण हाके यांच्या रक्ताचे नमुने चाचणीसाठी वैद्यकीय प्रयोगशाळेकडे पाठवण्यात आले आहे. त्यांचा अहवाल येण्यासाठी आणखी एक दोन दिवस लागू शकतात. दुसरीकडे हाके यांच्या तक्रारीवरून पोलिसांनी २० ते २५ मराठा आंदोलकांवर गुन्हे दाखल केले आहेत. दुसरीकडे हाके यांच्यावर कोणताही गुन्हा दाखल केलेला नाही.