कोकण आणि पश्चिम महाराष्ट्राला जोडणाऱ्या चिपळूण - कराड मार्गावरील कुंभार्ली घाटातील वाहतुकीला धोका निर्माण झाला आहे. घाटातील संरक्षक भिंत कोसळली आहे. त्यामुळे रस्ता खचण्याचा धोका आहे.

या मार्गावरील रस्ता खचला तर, घाटातील वाहतूक बंद होण्याची शक्यता व्यक्त केली जात आहे. खोल दरीच्या जवळील भागातच रस्त्यालगतची संरक्षक भिंत कोसळली आहे. तसेच रेलिंग देखील तुटली आहे. तात्पुरत्या स्वरुपात डागडुजी म्हणून घटनास्थळी दगड लावण्यात आले आहेत. मात्र, यामुळे अपघाताचा धोका वाढल्याचे सांगितले जात आहे. प्रशासनाकडून या गंभीर घटनेकडे दुर्लक्ष केले जात असल्याचे वाहनचालकांचे म्हणणे आहे. याच घाटरस्त्यातून अवजड वाहतूक मोठ्या प्रमाणात सुरू असते. त्यामुळे प्रशासनाने तात्काळ उपाययोजना केली पाहिजे, अशी अपेक्षा व्यक्त केली जात आहे.