कोल्हापूर–मुंबई ११०३० कोयना एक्सप्रेस शनिवारी सायंकाळी खंडाळा घाट उतरून कर्जत स्थानकात दाखल झाल्यानंतर एका डब्याजवळ ब्रेकमधून धूर येत असल्याचे दिसल्याने रेल्वे प्रशासनाने खबरदारीचा उपाय म्हणून गाडी १० मिनिटे थांबवली. गाडी थांबताच काही प्रवाशांनी घाबरून डब्यांमधून खाली उतरण्यास सुरुवात केली. त्यामुळे स्थानकावर काही काळ भीतीचे वातावरण निर्माण झाले. रेल्वे कर्मचाऱ्यांनी तातडीने ब्रेक यंत्रणेची तपासणी केली असता कोणताही धोका नसल्याचे स्पष्ट झाले. सायंकाळी ६:२६ वाजता कर्जतला आलेली कोयना एक्सप्रेस ६:३६ वाजता सुरक्षितपणे मुंबईच्या दिशेने रवाना करण्यात आली. रेल्वे प्रशासनाने प्रवाशांना अफवांवर विश्वास न ठेवण्याचे आवाहन केले आहे.