निवडणूक आयोगाच्या मतदार यादीतील गोंधळ दिवसेंदिवस वाढत असून, कोपरखैरणे येथे एक धक्कादायक प्रकार समोर आला आहे. महाराष्ट्र नवनिर्माण सेनेचे विभाग अध्यक्ष चंद्रकांत डांगे यांनी उघडकीस आणलेल्या या प्रकरणात एकाच मोबाईल नंबरवर तब्बल २८८ मतदारांची नोंदणी झाल्याचे आढळले आहे. विशेष म्हणजे, हा मोबाईल नंबर एका शासकीय अधिकाऱ्याचा, म्हणजेच तलाठ्याचा आहे. चंद्रकांत डांगे यांच्या म्हणण्यानुसार, 'एकाच मोबाईल नंबरवर दोनशे अठ्यायशी लोकांची नावं ही अॅड केलेली आहे'. यादीतील अनेक मतदार दिलेल्या पत्त्यावर राहत नसल्याचेही तपासात समोर आले आहे. या गंभीर प्रकारामुळे निवडणूक प्रक्रियेच्या पारदर्शकतेवर मोठे प्रश्नचिन्ह निर्माण झाले असून, याची सखोल चौकशी करण्याची मागणी जोर धरू लागली आहे.