कोल्हापूर: विशाळगडावर ईद आणि ऊरुस साजरा केल्यास उधळून लावू असा इशारा काही दिवसांपूर्वी हिंदुत्ववादी संघटनेने दिला होता. बकरी ईदच्या निमिताने मुंबई हायकोर्टाने विशाळगडावर कुर्बानी देण्यास परवानगी दिली होती. यानंतर हिंदू संघटनेने यावर आक्षेप घेत कोल्हापूरच्या जिल्हाधिकारी कार्यालयासमोर आंदोलन केले होते.

यावरच आज कोल्हापूरचे पोलीस अधीक्षक यांनी माहिती दिली आहे. गडावर उरूसला परवानगी नाकारली असून कोणत्याही पद्धतीने उरूस, आणि कुठलाही सन गडावर करता येणार नाही.अशी माहिती पोलीस अधीक्षक योगेश कुमार यांनी दिली आहे. या पार्श्वभूमीवर कुठलाही अनुचित प्रकार घडू नये म्हणून विशाळगड येथे मोठा पोलीस बंदोबस्त तैनात करण्यात आला आहे. तसेच कोल्हापूर ही शाहू नगरी आहे. त्यामुळे जिल्ह्याला गालबोट लागणार नाही या दृष्टीने सर्वच समाजाने काळजी घ्यावी असं आवाहन देखील कोल्हापूर पोलीस अधीक्षक योगेश कुमार यांनी केले आहे.