कोल्हापूर: संपूर्ण राज्यात सध्या अवकाळी पावसाने धुमाकूळ घातल्यामुळे अनेक शहरात जनजीवन विस्कळीत झाले आहे. अशातच गेल्या चार दिवसांपासून कोल्हापुरात सुरु असलेल्या मुसळधार मान्सूनपूर्व पावसामुळे पंचगंगा नदीच्या पात्रात लक्षणीय वाढ झाली आहे. परिणामी, गुरुवारी दुपारी सुमारे अडीच वाजता राजाराम बंधाऱ्यावर पाणी आले. सुरक्षिततेच्या कारणास्तव प्रशासनाने तत्काळ दोन्ही बाजूंनी बंधाऱ्यावरची वाहतूक बंद केली आहे.

दरम्यान, शहर व परिसरात पावसाचा जोर कायम असून नदीची पातळी सातत्याने वाढत आहे. हवामान विभागाने पुढील काही दिवस पावसाचा अंदाज वर्तवला आहे. नागरिकांनी दक्षता घेण्याचे आवाहन प्रशासनाकडून करण्यात आले आहे.