कोल्हापूर: राज्यभरात सध्या अवकाळी पावसाने थैमान घातले आहे. या पावसामुळे शेत पिकांचे नुकसान झाले असून कोल्हापूरमध्ये देखील पूर सदृश परिस्थिती निर्माण झाली आहे. शिरोळ तालुक्यातील कृष्णा नदीवरील राजापूर बंधाऱ्यात पाण्याची पातळी १६ फूट ३ इंचांवर पोहोचल्याने बंधारा ओव्हरफ्लो झाला.

बंधाऱ्यावरून सुमारे ६ इंच पाणी वाहू लागले असून, सध्या ३ हजार क्यूसेक वेगाने कर्नाटकच्या दिशेने विसर्ग होत आहे. यावर्षी कोयना वारणा धरणातून पाण्याचा विसर्ग ठेवण्यात आल्याने प्रशासनाने सुरुवातीलाच बंधाऱ्याचे सर्व बरगे बसवून पाण्याची पातळी १४ फुटांवर स्थिर ठेवली होती. मात्र, मागील चार दिवसांपासून शिरोळ तालुक्यात जोरदार वळवाचा पाऊस झाला. त्यामुळे शेतीसाठी पाण्याची मागणी घटली आणि नदीतील पाणीसाठ्यात मोठी वाढ झाली. परिणामी, बंधाऱ्याची पाणीपातळी वाढून तो ओव्हरफ्लो झाला.