गेल्या २४ तासांपासून खारघर परिसर अंधारात असून, नागरिकांना प्रचंड त्रासाला सामोरे जावे लागत आहे. भिंगारी उपविभागातील ३३ केव्ही अधिराज फिडरला आग लागून केबल्स जळल्यामुळे ही गंभीर परिस्थिती निर्माण झाली आहे. या दुर्घटने नंतर तब्बल १२६ ट्रान्सफार्मर आणि २ उपकेंद्रे बंद पडली आहेत. विशेषतः खारघरमधील टाटा-१ आणि टाटा-२ या भागांतील १२ ट्रान्सफार्मर बंद असल्याने हजारो घरांमध्ये वीज पुरवठा पूर्णपणे खंडित झाला आहे.

महावितरणाकडून अद्यापही विजपुरवठा कधी पूर्ववत होणार याबाबत कोणतीही स्पष्ट माहिती देण्यात आलेली नाही. त्यामुळे नागरिकांमध्ये अस्वस्थता आणि नाराजी वाढली आहे. विजेअभावी पाणिपुरवठा, मोबाईल चार्जिंग, इंटरनेट आणि दैनंदिन जीवनावश्यक गोष्टींवर मोठा परिणाम झाला असून, प्रशासनाकडून लवकरात लवकर वीज पुरवठा सुरळीत करण्याची मागणी होत आहे.