राष्ट्रवादी काँग्रेस शरदचंद्र पवार पक्षाचे कळवा-मुंब्रा मतदारसंघाचे आमदार जितेंद्र आव्हाड यांना जीवे मारण्याची धमकी मिळाल्याची खळबळजनक माहिती समोर आली आहे. एका अज्ञात व्यक्तीने थेट फोन करून आव्हाडांना अर्वाच्य भाषेत शिवीगाळ केली, तसेच एक व्यक्ती त्यांच्या घराबाहेर उभी असल्याची माहिती दिली. या प्रकारची गंभीर दखल घेत खुद्द आमदार जितेंद्र आव्हाड यांनी सोशल मीडिया प्लॅटफॉर्म 'एक्स' (Ex) वर पोस्ट करत या संपूर्ण घटनेची माहिती दिली आहे.

आमदार आव्हाड यांना अशा स्वरूपाच्या धमक्या मिळण्याची ही पहिलीच वेळ नाही. यापूर्वी देखील त्यांच्या घराजवळ बॉम्ब ठेवल्याची धमकी ई-मेल द्वारे देण्यात आली होती. वारंवार अशा प्रकारे जीवे मारण्याच्या धमक्या येत असल्याने राजकीय वर्तुळात एकच खळबळ उडाली आहे. आमदारांच्या सुरक्षेचा प्रश्न पुन्हा एकदा ऐरणीवर आला आहे. या प्रकरणी पोलीस प्रशासनाकडून काय पावले उचलली जातात, याकडे सर्वांचे लक्ष लागून आहे.