राज्याच्या राजकीय वर्तुळात राजकीय भूकंपची तयारी सुरू आहे असं सूत्रांकडून सांगण्यात येत आहे. अजित पवार यांच्या राष्ट्रवादीचे प्रदेशाध्यक्ष सुनील तटकरे यांनी आता शरद पवार यांच्या खासदारांना संपर्क करायला सुरुवात केली असल्याचा दावा शरद पवार यांच्या राष्ट्रवादीचे आमदार जितेंद्र आव्हाड यांनी केला आहे. शिवाय रोहित पवार यांनी देखील या संदर्भात विधान केलं आहे. दिल्लीमध्ये संसदेच्या अधिवेशनादरम्यान खासदारांसोबत संपर्क साधला असल्याचा दावा या दोघांनीही केला असल्याचं बघायला मिळत आहे.

जितेंद्र आव्हाड यांनी याबद्दल बोलताना म्हटलं की, सुनील तटकरे यांनी फोन केलेले नाही. दिल्ली येथे संसदेच्या अधिवेशनात त्यांनी आमच्या खासदारांना भेटून बाप-लेकीला सोडून द्या, आणि आमच्याकडे येऊन जा अशी ऑफर दिली आहे. आमचा पक्ष घेतला, निशाणी घेतली आता खासदारपण पळवायच्या तयारीत आहे. लोकांच्या मनात काय आहे तेच कळत नाही, असं आव्हाड म्हणाले आहेत.

तर अंदर रोहित पवार यांनी देखील यावर भाष्य केलं आहे. दिल्लीत अधिवेशन सुरू होतं तेव्हा आमच्या खासदारांना अशा प्रकारे संपर्क सुनील तटकरे यांनी केला होता, हे माझ्याही कानावर आलेलं आहे. मात्र त्यांनी कितीही संपर्क केला तरी त्याबद्दल यांचे खासदार आणि आमदार काहीही वेगळा निर्णय घेणार नाही. आम्ही सगळे पवार साहेबांच्या मार्गदर्शनाखाली काम करत आहेत. पवार साहेब जे सांगतील ते आम्ही करणार आहे, असं रोहित पवार यांनी सांगितलं आहे.