काँग्रेसचे नेते बाळासाहेब थोरात यांची कन्या जयश्री थोरात या पुन्हा एकदा आक्रमक झाल्याचं बघायला मिळत आहे. त्यांच्याबाबत भाजपचे नेते वसंत देशमुख यांनी वादग्रस्त वक्तव्य केल्यामुळे अहमदनगरमध्ये तणाव निर्माण झाला आहे. या वक्तव्यानंतर काँग्रेसने जिल्ह्यामध्ये ठिकठिकाणी आंदोलन केलं. जाळपोळ आणि तोडफोडीच्या घटना घडल्या. या घटनेवरून सध्या थोरात आणि विखे-पाटील यांच्यात आरोप प्रत्यारोप सुरू आहेत. अशातच जयश्री थोरात यांच्यासह काँग्रेसच्या कार्यकर्त्यांविरोधात गुन्हा दाखल करण्यात आला. त्यानंतर जयश्री थोरात पुन्हा आक्रमक झाल्या असून त्यांनी पुन्हा संगमनेर पोलिस ठाण्यावर शेकडो महिला कार्यकर्त्यांसह धाव घेतली. यावेळी त्यांनी त्यांच्यावर आणि समर्थकांवर दाखल झालेले गुन्हे तातडीने मागे घ्या आणि वसंत देशमुख यांच्यावर कठोर कारवाई करा, असं निवेदन दिलं. 'मला अटक करा. पण बाकीच्यांना त्रास देऊ नका.', अशी मागणी देखील त्यांनी केली.

Edited By Rakhi Rajput