नगपरिषदेच्या मतदानाच्या दिवशी जळगाव येथील मुक्ताईनगरमध्ये भाजप आणि शिवसेनेच्या कार्यकर्त्यांमध्ये जोरदार राडा झाला. केंद्रीय राज्यमंत्री रक्षा खडसे आणि शिवसेनेचे आमदार चंद्रकांत पाटील यांच्या कार्यकर्त्यांमध्ये अक्षरशः हाणामारी झाली होती. सोमवारी मतदानाच्या दिवशी रक्षा खडसे यांनी मुक्ताईनगर पोलिस स्टेशनमध्ये शिवसेनेच्या कार्यकर्त्यांनी मारहाण केल्याच्या आरोपावरून काही शिवसैनिकांविरुद्ध गुन्हा दाखल केला होता. याविषयी चंद्रकांत पाटील यांना माहिती मिळताच ते भाजप कार्यकर्त्यांविरोधात गुन्हे दाखल करण्यासाठी आमदार चंद्रकांत पाटील यांच्यासह कार्यकर्ते पोलिस स्टेशनमध्ये दाखल झाले. मतदान केंद्रावर गोंधळ घालून शिवसेनेच्या कार्यकर्त्यांना भाजपच्या कार्यकर्त्यांकडून मारहाण झाल्याचा आरोप आमदार चंद्रकांत पाटील यांनी केला आहे.