जळगाव जिल्ह्यातील भडगाव शहरात आज एक गंभीर घटना घडली. छत्रपती शिवाजी महाराज चौकात असलेल्या नवी मिलन हॉटेलमध्ये अचानक स्फोट झाल्याने परिसरात एकच खळबळ उडाली. स्फोटावेळी हॉटेलमध्ये चहा पिण्यासाठी बसलेले सुमारे दहा ते पंधरा जण गंभीर जखमी झाले आहेत. स्फोट इतका जोरदार होता की संपूर्ण परिसर हादरून गेला. अपघातानंतर भडगावकरांनी तत्काळ मदतीस धाव घेत जखमींना भडगाव, पाचोरा व जळगाव येथील सरकारी रुग्णालयात उपचारासाठी रवाना केलं. घटनेची माहिती मिळताच पाचोरा-भडगाव मतदारसंघाचे आमदार किशोर पाटील यांनी घटनास्थळी धाव घेऊन परिस्थितीचा आढावा घेतला. दरम्यान, स्फोटाचे कारण स्पष्ट झाले नसून काहींच्या मते हा स्फोट सिलेंडरचा तर काहींच्या मते फ्रीजच्या कॉम्प्रेसरचा असल्याचा अंदाज व्यक्त केला जात आहे. या घटनेचा पोलिसांकडून अधिक तपास सुरू आहे.