अमेरिकेची राजधानी वॉशिंग्टन डीसीमध्ये बुधवारी रात्री उशिरा (भारतीय वेळेनुसार गुरुवारी सकाळी) धक्कादायक घटना घडली. अमेरिकेतील इस्रायली दूतावासामधील दोन अधिकाऱ्यांची हत्या करण्यात आली. दोघेही अधिकारी कॅपिटल यहूदी म्युझियममध्ये आयोजित एका कार्यक्रमात सहभागी झाले होते. म्युझियममधून बाहेर आल्यानंतर हल्लेखोरानं त्यांच्यावर बेछूट गोळीबार केला. यात त्यांचा मृत्यू झाला.

या घटनेनंतर स्थानिक पोलिसांनी हल्लेखोराला अटक केली. दोन्ही अधिकाऱ्यांवर गोळ्या झाडण्यापूर्वी त्यानं पॅलेस्टाइनला स्वतंत्र करा अशी घोषणा दिली. पोलिसांच्या माहितीनुसार, घटनास्थळी पोहोचण्याआधीच दोन्ही अधिकाऱ्यांचा मृत्यू झाला होता. हा दहशतवादी हल्ला असल्याची शक्यता व्यक्त केली जात आहे. पोलिसांनी त्या दिशेने तपास सुरू केला आहे. अमेरिकी अध्यक्ष डोनाल्ड ट्रम्प यांनी या घटनेवर प्रतिक्रिया दिली आहे. या घटनेचा निषेध त्यांनी नोंदवला आहे. द्वेष आणि कट्टरपंथींना अमेरिकेत थारा नाही. पीडितांच्या कुटुंबाबद्दल सहवेदना व्यक्त करतोय. अशा घटना खूप वेदनादायी आहेत, असंही ट्रम्प यांनी शोकसंदेशात म्हटलं आहे.