आज २१ जून रोजी देशभरात ११ वा आंतरराष्ट्रीय योग दिन मोठ्या उत्साहात साजरा होत आहे. "एक पृथ्वी, एक आरोग्य" या संकल्पनेवर आधारित यंदाच्या योग दिनासाठी देशभरात तब्बल ११ लाखांहून अधिक ठिकाणी कार्यक्रम नोंदवले गेले आहेत. देशातील विविध शाळा, महाविद्यालयं, संस्था, सरकारी कार्यालये, संरक्षण दल आणि स्वयंसेवी संस्था यामध्ये मोठ्या प्रमाणावर सहभाग दिसून आला आहे.

पंतप्रधान नरेंद्र मोदी यांनी आंध्र प्रदेशातील विशाखापट्टणम येथे नागरिकांसमवेत योगसाधना करत आरोग्यदायी जीवनशैलीचा संदेश दिला आहे. त्यांनी योगाच्या माध्यमातून शरीर आणि मनाच्या आरोग्याचे महत्त्व अधोरेखित केले. यासोबतच जगभरातील भारतीय दूतावास आणि सांस्कृतिक केंद्रांनीही आंतरराष्ट्रीय स्तरावर विविध ठिकाणी योग सत्रांचे आयोजन करत योगाचा जागतिक प्रचार व प्रसार केला आहे.