राहुल गांधी यांच्या विमानात बिघाड झाल्याने चिखली येथील त्यांची आजची सभा रद्द करण्यात आली आहे. राहुल गांधी यांच्या जागी आता रमेश चेन्नथला व सचिन पायलट हे चिखलीची सभा घेणार आहेत. तांत्रिक अडचणींमुळे राहुल गांधी यांचं विमान आज छत्रपती संभाजीनगर विमानतळावर उतरू शकलं नाही. त्यानंतर हे विमान पुन्हा दिल्लीच्या दिशेने रवाना झालं. त्यामुळे मंगळवारी बुलढाण्याच्या चिखलीत होणारी राहुल गांधी यांची सभा रद्द करावी लागली आहे. त्यांची सभा आता थेट गोंदियामध्ये होणार आहे. दरम्यान, यानंतर राहुल गांधी यांनी या बाबत एक व्हिडिओ बनवून सभा रद्द झाल्याने माफी मागितली आहे. 'तांत्रिक अडचण आल्याने मला चिखलीत पोहोचता आलं नाही. त्यामुळे इथली माझी सभा आणि रॅली रद्द करावी लागली. त्यासाठी मी माफी मागतो. आज चिखलीत मी सोयाबीन उत्पादक शेतकऱ्यांशी संवाद साधणार होतो. राज्यातील सोयनीब आणि कापूस उत्पादक शेतकरी अडचणीत आहेत. त्यांच्या मालाला योग्य भाव सरकार देत नाही आहे. मविआचं सरकार आलं तर आम्ही नक्कीच शेतकऱ्यांचे प्रश्न मार्गी लावू', असा दावा त्यांनी आपल्या व्हिडिओ मधून केला आहे.

Edited By Rakhi Rajput