हिंगोलीतील सार्वजनिक दसरा महोत्सवावर मुसळधार पावसाने अक्षरश: पाणी फेरले आहे. देशातील क्रमांक दोन मानल्या जाणाऱ्या या दसरा उत्सवात यावर्षी महाराष्ट्रासह इतर राज्यांतून आलेल्या व्यापाऱ्यांनी मोठ्या प्रमाणात आपले स्टॉल लावले होते. मात्र रात्री सुमारे आठच्या सुमारास अचानक ढगफुटी सदृश पावसाने हाहाकार माजवला. या मुसळधार पावसामुळे अनेक व्यापाऱ्यांचे साहित्य भिजून मोठ्या प्रमाणात नुकसान झाले आहे. नागरिकांना देखील पावसापासून बचाव करण्यासाठी धावपळ करावी लागली. व्यापाऱ्यांनी मोठ्या खर्चाने आणलेले साहित्य पावसात नष्ट झाल्याने त्यांच्यावर मोठे आर्थिक संकट कोसळले आहे. अचानक आलेल्या या पावसामुळे उत्सवाचा उत्साह कमी झाला असून प्रशासन आणि आयोजकांकडून नुकसानग्रस्त व्यापाऱ्यांना मदतीची मागणी होत आहे.