पुण्याला मान्सून पूर्व पावसाने झोडपून काढले. या पावसामुळे पुण्यातील रस्त्यांना नदीचे स्वरूप आले आहे. पुण्यात कोंढवा परिसरात मुसळधार पाऊस पडत आहे. पहिल्याच पावसामुळे पुणे जलमय झालं. पुण्यातील हडपसर परिसरामध्ये असणाऱ्या वाडकर मळ्यात रस्त्याला नदीचे स्वरूप आले आहे. रस्त्यावर पाणीच पाणी झाले आहे. प्रशासनाच्या गलथान कारभाराचा पुणेकरांना फटका बसल्याचा आरोप शिवसेना शहरप्रमुख नाना भानगिरे यांनी केला आहे. मुळशी तालुक्यात आज दुपारी ३ वाजल्यापासून जोरदार पाऊस पडत आहे. याठिकाणी ढगांचा गडगडाट आणि विजांच्या कडकडाटासह पाऊस पडत आहे. या पावसामुळे उकाड्याने हैराण झालेल्या पुणेकरांना दिलासा मिळाला.

काही दिवसांपासून पुणे शहरात तापमानाचा पारा ४० अंशाच्या पुढे गेल्याचे आपल्याला पाहायला मिळालं होतं. आज सकाळपासून पुणे शहरात ढगाळ वातावरण होते. दुपारी पुणे शहरात मुसळधार पावसाला सुरुवात झाली. पुणे शहरातील उपनगर तसेच मध्यवर्ती भागात पावसाच्या सरी बरसू लागल्या. हवामान विभागाने दिलेल्या अंदाजानुसार पुढील २ दिवस पुणे शहरात पावसाची शक्यता आहे. अचानक आलेल्या पावसामुळे निश्चित काही पुणेकरांची तारांबळ उडाली असली तरी सुद्धा उकाडापासून पुणेकरांना नक्कीच या पावसाने दिलासा दिला आहे.