नंदुरबार जिल्ह्यातील काकळदा परिसरात तुफान पाऊस सुरू झाला आहे. गेल्या अर्धा तासापासून काकडदा परिसरात पावसाची जोरदार बॅटिंग सुरू आहे. हवामान खात्याने दिलेल्या यलो अलर्टनंतर जोरदार पाऊस बरसताना दिसून आला आहे.

वर्ष अखेरीस जोरदार पावसासह गारपीटीची शक्यता असल्याचा अंदाज हवामान विभागाने वर्तवला होता. राज्यातील काही तालुक्यात यलो अलर्ट देखील देण्यात आला होता. त्यानंतर आज नंदुरबार जिल्ह्यात आज काही भागात जोरदार पावसाने दुपारनंतर हजेरी लावली. नंदुरबारच्या काकडदा येथे तूफान पाऊस झाला असून यामुळे सगळीकडे पाणीच पाणी झालं आहे. अर्धतास चाललेल्या या पावसामुळे नागरिकांची चांगलीच तारांबळ उडलेली बघायला मिळाली. तर अवकाळी पावसामुळे शेती पिकांवरही मोठ्या प्रमाणात नुकसान होण्याची शक्यता आहे. तसंच पावसामुळे आंब्याच्या उत्पादनात मोठ्या प्रमाणात घट येईल असंही काही शेतकऱ्यांकडून सांगण्यात आलं आहे.