नांदेड: काल रात्रीपासून नांदेड जिल्ह्यात जोरदार पावसाला सुरुवात झाली असून पावसाचा जोर अजूनही कायम आहे. नांदेडसह लातूर आणि बिदर जिल्ह्यातही मोठ्या प्रमाणात पाऊस झाल्याने मुखेड तालुक्यातील लेंडी नदीला पूर आला आहे. पुरामुळे लेंडी धरणात पाण्याची मोठ्या प्रमाणात आवक झाली असून सुरक्षिततेच्या दृष्टीने धरणाचे सर्व दरवाजे उघडण्यात आले आहेत. धरणातून सुरू असलेल्या विसर्गामुळे लेंडी नदीला मोठा पूर आला आहे. या पुरामुळे जिल्ह्यातील कंधार, नायगाव, बिलोली, देगलूर आणि धर्माबाद या भागात पुरस्थिती गंभीर झाली आहे. अनेक नदी-नाले तुडुंब भरून वाहत असून शेतजमिनी व घरांमध्ये पाणी शिरले आहे. काही गावांचा संपर्क पूर्णपणे तुटला असून अनेक गावांना पुराचा वेढा बसला आहे. अचानक आलेल्या या पूरस्थितीमुळे जनजीवन विस्कळीत झाले असून नागरिकांना मोठ्या अडचणींचा सामना करावा लागत आहे. प्रशासनाने खबरदारीचा इशारा दिला असून निचांकी भागातील नागरिकांना सुरक्षित स्थळी हलविण्याचे काम सुरू आहे.