मुंबई, ठाणे आणि आसपासच्या परिसरात आज सकाळपासून मुसळधार पाऊस कोसळला. पुढील १२ तास अत्यंत धोक्याचे असल्याचा अलर्टही देण्यात आला आहे. काही ठिकाणी आज दुपारनंतर शाळा सोडण्यात आल्या. तर उद्याही काही ठिकाणच्या शाळांना सुट्टी देण्यात आली आहे. दुसरीकडे सकाळपासूनच रेल्वे सेवा विस्कळीत झाली होती. त्यामुळे मुंबई, ठाणे आणि उपनगरांत नोकरीसाठी सकाळीच घरातून बाहेर पडलेल्या प्रवाशांना प्रचंड मनस्ताप सहन करावा लागला.

हवामान विभागाकडून पुढील काही तासांसाठी पावसाचा अलर्ट दिला आहे. त्यामुळे नोकरदार वर्ग परतीच्या वाटेला लागला. ठाणे रेल्वे स्थानकात प्रवाशांची तुफान गर्दी झाली होती. त्यात लोकल सेवा अजूनही उशिराने आहे. फलाट क्रमांक दोन, तीन आणि पाचवर कसारा आणि कर्जतच्या दिशेने जाणाऱ्या लोकल ट्रेन पकडण्यासाठी प्रवाशांनी गर्दी केली होती. तिकडे दादरमध्येही काही ठिकाणी पाणी साचलं होतं. पावसाची रिपरिपही सुरू होती. हिंदू कॉलनी, हिंदमाता, पारसी कॉलनी आदी परिसरात पाणी साचलं होतं. दादर रेल्वे स्थानकातही प्रवाशांची प्रचंड गर्दी झाली होती.