भारतीय जनता पक्षाचे नेते हर्षवर्धन पाटील यांनी सोमवारी शरद पवार यांच्या उपस्थितीमध्ये त्यांच्या राष्ट्रवादी काँग्रेस पक्षामध्ये प्रवेश केला. इंदापूरमध्ये हा पक्ष प्रवेश सोहळा पार पडला आहे. भाजप नेते हर्षवर्धन पाटील इंदापूर विधानसभा मतदारसंघातून निवडणुकीसाठी इच्छुक आहेत. मात्र या मतदारसंघावर अजित पवार यांच्या पक्षाचा दावा आहे. विद्यमान आमदार अजित पवार यांचा असल्यामुळे हा मतदारसंघ भाजपला सुटण्याची शक्यता फारच कमी आहे. या कारणाने हर्षवर्धन पाटील गेल्या काही दिवसांपासून अस्वस्थ असल्याची चर्चा होती. त्यातच त्यांनी शरद पवार यांची भेट घेतल्यामुळे ते तुतारी हाती घेणार, हे जवळपास निश्चित मानले जात होते. त्यानुसार त्यांनी दोन दिवसापूर्वी शरद पवार गटात प्रवेश करणार असल्याची अधिकृत घोषणा करत आज कार्यकर्त्यांसह त्यांचा पक्षप्रवेश शरद पवार यांच्या उपस्थितीत पार पडला आहे. त्यामुळे आता दत्ता भरणे यांच्या विरोधात हर्षवर्धन पाटील यांचं आव्हान उभ ठाकण्याची शक्यता आहे. दरम्यान, आजच्या या सोहळ्यात शरद पवार हे हर्षवर्धन पाटील यांची उमेदवारी जाहीर करतात का? हे पाहाणं देखील महत्वाचं ठरणार आहे.