गुरुपौर्णिमेनिमित्त शिर्डीच्या साईबाबा मंदिरात मोठ्या भक्तिभावात उत्सव साजरा करण्यात येत आहे. या तीन दिवसीय गुरुपौर्णिमा महोत्सवाचा आज मुख्य दिवस असून, आज सकाळपासूनच साई समाधी मंदिर तसेच गुरुस्थान मंदिरात दर्शनासाठी भाविकांनी मोठ्या प्रमाणावर गर्दी केली आहे.साईबाबांना आपल्या गुरूस्थानी मानणारे लाखो भक्त दरवर्षी या दिवशी शिर्डीत येतात. यंदाही देशभरातून आणि परदेशातून आलेल्या साईभक्तांनी शिर्डीमध्ये हजेरी लावली आहे. सकाळपासूनच रांगा लागलेल्या असून, "साईराम" च्या जयघोषात संपूर्ण परिसर भक्तिमय वातावरणाने न्हालेला आहे.

मंदिर परिसर फुलांनी सजवण्यात आला असून, आकर्षक विद्युत रोषणाईमुळे रात्रीचे दृश्य मंत्रमुग्ध करणारे आहे. साई संस्थानकडून भाविकांच्या सोयीसाठी विशेष व्यवस्था करण्यात आली आहे. मंदिर परिसरात सुरक्षा व्यवस्था वाढवण्यात आली असून, स्थानिक प्रशासन, पोलीस आणि स्वयंसेवक भाविकांच्या सेवेत तैनात आहेत. हा दिवस साई भक्तांसाठी अत्यंत महत्त्वाचा मानला जातो आणि प्रत्येक भक्त साई चरणी कृतज्ञतेची भावना व्यक्त करत आहे.