नागपूर : मुंबईतून लोकसभा निवडणूक लढवणार का? असा प्रश्न गोविंदा यांना विचारण्यात आला. त्यावर त्यांनी सविस्तर प्रतिक्रिया दिली. एकनाथ शिंदेंना पाठिंबा देत शिवसेनेत प्रवेश केल्यानंतर ते मुंबईतून निवडणूक लढवतील, अशी शक्यता वर्तवली जात होती. मात्र उमेदवारीच्या अनुशंगाने आपली कोणतीही चर्चा न झाल्याची माहिती अभिनेते गोविंदा यांनी यावेळी दिली. रामटेकमध्ये राजू पारवे यांच्या प्रचारासाठी अभिनेता गोविंदा यांची प्रचार सभा होणार होती. त्यासाठी गोविंदा नागपुरात दाखल झाल्यानंतर त्यांनी माध्यमांशी बातचीत केली. नागपूर विमानतळावर दाखल होताच अभिनेते आणि माजी खासदार गोविंदा यांनी महत्त्वाची प्रतिक्रिया दिली. यश हे कर्तृत्वावरच मिळतं, असं गोविंदा यांनी यावेळी म्हटलं. लोकसभेच्या पहिल्या टप्प्यात विदर्भातील महत्त्वाचे मतदार संघातही निवडणूक होणार आहे. गोविंदा यांनी एकनाथ शिंदे यांना पाठींबा देत शिवसेनेत नुकताच प्रवेश केला होता. त्यानंतर त्यांची ही पहिलीच प्रचार सभा असणार आहे.