एरवी वेगवेगळे मुद्दे, प्रश्नांवरून आंदोलन आणि घोषणांनी दणाणून जाणाऱ्या मुंबईतील आझाद मैदानात ५ डिसेंबरला आनंदाची लाट आली होती. मुख्यमंत्री आणि उपमुख्यमंत्र्यांचा शपथविधी सोहळा होता. देवेंद्र फडणवीस, एकनाथ शिंदे आणि अजित पवार यांच्या समर्थकांच्या घोषणांनी या आनंदाला पारावार उरला नव्हता. समर्थक, कार्यकर्ते, नेते आणि पदाधिकारी आनंद साजरा करत असतानाच, चोरटे मात्र सावज शोधत होते. या चोरट्यांनी संधी साधून ४ महिलांसह ११ जणांकडील कॅश, दागिने आणि मोबाइलवर डल्ला मारला.

त्यांच्याकडील सोन्याच्या चेन लांबवल्या. तर कार्यकर्त्यांकडील हजारोंची रोकड लंपास केली. चोरट्यांनी या सोहळ्यात उपस्थित असलेल्या कार्यकर्त्यांकडील तब्बल १२ लाखांचा ऐवज लांबवला. या शपथविधी सोहळ्यात कडेकोट बंदोबस्त होता. आझाद मैदानाच्या चहूबाजूला पोलिसांचा कडा पहारा होता. पण पोलिसांची नजर चुकवून या चोरट्यांनी सावज हेरून हात साफ केला.