नांदेड जिल्ह्यातील गोदावरी नदीपात्रात अवैधरित्या वाळू उपसा करणाऱ्या टोळीवर नांदेड ग्रामीण पोलिसांनी मोठी कारवाई केली आहे. या कारवाईत पोलिसांनी तब्बल 21 लाख 75 हजार रुपयांचा मुद्देमाल जप्त केला असून, वाळू उपसा करणारे तराफे जाळून नष्ट करण्यात आले. विशेष म्हणजे ही कारवाई करताना पोलिसांनी थेट गोदावरी नदीच्या पाण्यात उड्या मारत अवैध वाळू उपसावर आळा घातला. यावेळी उत्तर प्रदेशातून आलेले मजूर अवैध वाळू उपसासाठी काम करत असल्याचे उघडकीस आले आहे. या प्रकरणी पोलिसांनी आठ आरोपींविरुद्ध नांदेड ग्रामीण पोलीस ठाण्यात गुन्हा दाखल केला असून, पुढील तपास सुरू आहे. नदीपात्रातील बेकायदेशीर वाळू उपसामुळे पर्यावरणासह जलसंपत्तीवरही धोका निर्माण झाला असून, पोलिसांनी केलेली ही धडक कारवाई कौतुकास पात्र ठरते आहे.