छत्रपती संभाजीनगर जिल्ह्यातील गंगापूर येथे भरदिवसा टवाळखोरांनी एका मुलीची छेडछाड केली. हा प्रकार वारंवार घडत असल्याने पीडित मुलीच्या वडिलांनी जाब विचारण्याचा प्रयत्न केला असता गावगुंडांनी त्यांना, मुलीला आणि तिच्या आईलाही बेदम मारहाण केली. मध्यस्थी करण्यास आलेल्या काही लोकांनाही मारहाण करण्यात आली.

या घटनेमुळे संपूर्ण जिल्ह्यात भीतीचे वातावरण निर्माण झाले आहे. नुकतीच सरपंच संतोष देशमुख यांच्या हत्येचे धक्कादायक फोटो समोर आल्याने महाराष्ट्र सुन्न झाला होता, आणि आता गंगापूरमध्ये घडलेल्या या घटनेमुळे कायदा-सुव्यवस्थेचा गंभीर प्रश्न निर्माण झाला आहे.

इयत्ता नववीत शिक्षण घेत असलेली ही मुलगी शाळेत जाताना व परत येताना काही टवाळखोर वारंवार छेडछाड करत होते. याचा जाब विचारण्यासाठी तिचे वडील गेले असता त्यांच्यावर हल्ला करण्यात आला. गावगुंडांनी मुलगी आणि तिच्या आईलाही बेदम मारले. मारहाण करताना समोर महिला आहे की मुलगी, याचा विचारही केला गेला नाही.

या प्रकारामुळे नागरिकांमध्ये तीव्र संताप आहे. अशा समाजविघातक प्रवृत्तींवर कठोर कारवाई व्हावी, अशी जोरदार मागणी केली जात आहे.