देशासह महाराष्ट्रात मान्सूनचं यंदा लवकर आगमन झालं आहे. याशिवाय मे महिन्यातच महाराष्ट्रातील विविध भागांत मान्सूनपूर्व पावसानं हजेरी लावली. त्यानंतर काही दिवस विश्रांती घेतली असली तरी, अधेमधे पावसाची बॅटिंग सुरूच आहे. मुंबईसह ठाणे आणि कोकणातही पावसानं दमदार हजेरी लावली आहे. पुण्यात तर सखल भागांत पाणी साचलं होतं. नाशिकमध्येही दमदार पाऊस झाला. त्यामुळं नाशिककरांसाठी जूनच्या पहिल्या आठवड्यातच चांगली वार्ता आली आहे. मे महिन्यात झालेल्या मुसळधार पावसामुळे गंगापूर धरणात नव्याने पाण्याची आवक वाढलीय, धरणाच्या पाणीपातळीतही वाढ झालीय. धरणात २५०९ दशलक्ष घनफूट पाणीसाठा झाला असून मागील वर्षाच्या तुलनेत १९ टक्के अधिक पाणीसाठा झालाय. जूनच्या सुरुवातीलाच गंगापूर धरण 44 टक्के भरलंय.