नगरपालिका निवडणुकीसाठी मतदान होत आहे. पण रायगडमधील महाड आणि रोह्यात मतदान प्रक्रियेला गालबोट लागलं आहे. रोह्यात नगरपालिका निवडणुकीत पैसे वाटपावरून राष्ट्रवादी काँग्रेस आणि भाजपमध्ये वादाची ठिणगी पेटली. राष्ट्रवादीच्या कार्यकर्त्यांनी भाजपच्या कार्यकर्त्याच्या कानाखाली मारली. यावरून मोठा वाद पेटला. रोह्यात तणावाची परिस्थिती निर्माण झाली होती. उमेदवाराला मारहाण केल्याचा आरोप भाजप कार्यकर्त्यांनी केला.

दरम्यान, राज्यातल्या इतर ठिकाणीही निवडणूक मतदानावेळी वाद झाले. मनमाडमध्ये प्रभाग क्रमांक ११ मध्ये भाजप आणि शिंदेंच्या शिवसेनेचे कार्यकर्ते आमनेसामने आले. दोन्ही गटाच्या कार्यकर्त्यांमध्ये हाणामारी झाली. त्यामुळं मतदान केंद्रावर आलेल्या मतदारांची भीतीनं पळापळ झाली. मुक्ताईनगरातील मतदान केंद्रामध्येही कार्यकर्त्यांमध्ये वाद पेटला होता. बुलढाणा शहरातील प्रभाग क्रमांक ६ मधील केंद्रावरही राडा झाला. बोगस मतदान करताना चार जणांना पकडून दिल्यानं वाद झाला. या बोगस मतदारांना चोप देण्यात आला. यामुळं काही वेळ गोंधळाची स्थिती निर्माण झाली होती.