दिल्लीतील लाल किल्ल्याजवळ झालेल्या भीषण स्फोटाचे पत्रकार दीपक शर्मा यांनी थरारक वर्णन केले आहे. शर्मा यांच्या म्हणण्यानुसार, सायंकाळी साडेसहा ते सातच्या सुमारास गेट क्रमांक एकजवळ मोठा स्फोट झाला, ज्यानंतर आगीचे मोठे लोळ उसळले. या घटनेमुळे परिसरात भीतीचे वातावरण पसरले आणि लोक सैरावैरा पळू लागले. या स्फोटातील सर्वात धक्कादायक बाब म्हणजे, एका व्यक्तीच्या मृतदेहाचे काही भाग स्फोटानंतर सुमारे दीडशे मीटर अंतरावर असलेल्या गौरी शंकर मंदिराजवळ येऊन पडले. सुरुवातीला सिलेंडरचा स्फोट झाल्याची चर्चा होती, मात्र घटनेचे स्वरूप अत्यंत गंभीर होते. शर्मा यांनी सांगितले की, स्फोटानंतर त्यांनी आणि इतर नागरिकांनी घाबरून सुरक्षित ठिकाणी धाव घेतली. हा स्फोट दिल्लीतील लाल किल्ला मेट्रो स्टेशनजवळ झाला होता.