उन्हाचा चटका वाढतोय. उष्णतेच्या लाटांनी मुंबई-महामुंबईसह राज्यभरातील नागरिक भाजून निघत आहेत. अशा कडक उन्हाच्या दिवसात बुधवारी दुपारी ३ वाजता अचानक मुंबईतील काही भागातील वीज गायब झाली. मुंबई उपनगर बोरीवली, मालाड, मीरा-भाईंदर, ठाणे, कल्याण आणि अंबरनाथ या भागांतील रहिवाशांना ५५ मिनिटांच्या वीज भारनियमनाचा त्रास सोसावा लागला. इतकेच नाही तर नाशिक आणि पुण्यातही हीच स्थिती होती. वीज वाहून नेणाऱ्या पारेषण वाहिन्यांमध्ये (ग्रीड) गुजरातमध्ये तांत्रिक बिघाड झाल्यामुळे महाराष्ट्रातील या भागांत वीजपुरवठा खंडित करण्यात आला होता. राज्यात कमाल तापमानात वाढ झालीय. त्यामुळे विजेची मागणीदेखील वाढलीय.