Maharashtra Assembly elections 2024: राज्यात प्रचाराचा धुरळा उडालाय. प्रचार ऐन रंगात आलाय. प्रचारसभांसाठी नेत्यांकडून राज्य पिंजून काढले जात आहे. आशातच निवडणूक अधिकारीही आपलं काम करत आहेत. पण उद्धव ठाकरे यांची सलग तीन दिवस तपासणी केल्यानंतर राज्यातील राजकारण तापलं. फक्त विरोधकांसाठी कायदा आहे का? असा सवाल उपस्थित होऊ लागला. बुधवारी उपमुख्यमंत्री, मुख्यमंत्र्‍यांच्याही वाहनांची तपासणी कऱण्यात आली. बुधवारी कोकणाच्या दौऱ्यावर असणाऱ्या उद्धव ठाकरे यांच्या गाडीची झडती घेण्यात आली होती. आज आदित्य ठाकरे यांच्या हॅलिपड आणि सामनाची तपासणी करण्यात आल्याचं समोर आलेय. याचा व्हिडीओ समोर आला आहे.

माजी मंत्री आणि शिवसेना नेते आदित्य ठाकरे आज कोकण दौऱ्यावर आहेत. दुपारी दापोलीमध्ये ते दाखल झाले. दापोलीमध्ये हेलिपॅडवर आदित्य ठाकरे यांच्या बॅगांची तपासणी करण्यात आली. हेलिकॉप्टर मधील बॅग सेक्शनचीही तपासणी झाली. निवडणूक विभागाच्या अधिकाऱ्यांकडून तपासणी करण्यात आली.

महायुती आणि महाविकास आघाडीच्या दिग्गज नेत्यांच्या राज्यभरातील विविध मतदारसंघात प्रचारसभा होत आहेत. बुधवारी दिवसभरात अजित पवार, एकनाथ शिंदे, देवेंद्र फडणवीस, नाना पटोले, उद्धव ठाकरे या नेत्यांच्या बॅगांची आयोगाच्या अधिकाऱ्यांकडून झडती घेण्यात आली.