मुख्यमंत्रि‍पदाच्या मुद्द्यावर एक पाऊल मागे आलेले एकनाथ शिंदे गृहखात्यासाठी आग्रही असल्याचे सूत्रांकडून सांगण्यात आले. गृहमंत्रिपदावर ते अडले असल्याचे सांगण्यात येत आहे. हे पद दिलं तरच उपमुख्यमंत्रिपद स्वीकारणार असल्याची अटच शिंदे यांनी दिल्लीच्या वरिष्ठ नेत्यांपुढे ठेवली असल्याचीही माहिती सूत्रांनी दिली.

मुख्यमंत्रिपद घेत असाल तर गृहमंत्रिपद द्या, अशी मागणी शिंदेंच्या शिवसेनेचे आमदार भरत गोगावले यांनी केली आहे. गृहमंत्रालय हे मागील वेळी फडणवीस यांच्याकडे होते. त्यावेळी फडणवीस हे उपमुख्यमंत्री होते. आता आम्हाला वाटतं की गृहखातं आमच्याकडे यावं यात चुकीचं काय आहे, असंही गोगावले म्हणाले.

आता आम्हाला प्रत्यक्षात खरं खोटं काहीच माहीत नाही. त्यामुळं यावर काही भाष्य करणं योग्य ठरणार नाही. मागणी ही होतच असते, असे भाजपचे आमदार संजय केळकर म्हणाले.