कोकणात एकनाथ शिंदेंच्या शिवसेनेने ठाकरेंच्या शिवसेनेला जोरदार धक्के देण्यास सुरुवात केली असताना, एकनाथ शिंदे यांनी नाशिकमध्ये उरलीसुरली ठाकरे सेना संपवून टाका, असं आवाहन उपस्थित शिवसैनिक आणि लाडक्या बहि‍णींना केलंय. त्यामुळे येत्या काही दिवसांत ठाकरेंना मोठे धक्के बसण्याची शक्यता व्यक्त केली जात आहे.

शिल्लक राहिलेली ठाकरेंची शिवसेना संपवून टाका असं आवाहन उपमुख्यमंत्री एकनाथ शिंदे यांनी केलं आहे. नाशिकमध्ये लाडक्या बहि‍णींसह शिवसैनिकांना हे आवाहन केलं आहे. विरोधकांनी आपल्याला हलक्यात घेऊ नये असा इशाराही त्यांनी दिला.

एक बार मैने कमिटमेंट कर दी तो मैं खुद की भी नही सुनता...असं माझं काम आहे. साधा कार्यकर्ता आहे. मला हलक्यात घेऊ नका. बाळासाहेबांचा आणि दिघे साहेबांचा कार्यकर्ता आहे. ज्यांनी मला हलक्यात घेतलं त्यांचं काय झालं तुम्हाला माहीत आहे, असंही ते म्हणाले.

अडीच वर्षे पायाला भिंगरी लावून एकही दिवस सुट्टी न घेता दिवस-रात्र एक करून रक्ताचे पाणी करून या ठिकाणी 18-18, 20-20 तास, कधी-कधी न झोपता देखील या तुमच्या एकनाथ शिंदेने काम केलं. अडीच वर्षे जे बंद करून ठेवलं होतं ते सगळं सुरू केलं. फक्त फेसबुक लाईव्ह करून काही होत नाही. लोकांमध्ये जावं लागतं. लोकांचे दुःख, त्यांच्या वेदना ऐकून त्यावर फुंकर घालावी लागते, अशा शब्दांत शिंदे यांनी उद्धव ठाकरे यांना टोला लगावला.