राज्याचे उपमुख्यमंत्री एकनाथ शिंदे यांची कार स्फोटानं उडवून देण्याची धमकी मुंबई पोलिसांना मिळाली होती. तशा आशयाचा मेल गोरेगाव आणि जे जे मार्ग पोलीस ठाण्याला मिळाला होता. त्यानंतर या प्रकरणाची गंभीर दखल घेऊन मुंबई पोलिसांनी चौकशी सुरू केली आहे. मेल जिथून पाठवण्यात आला आहे, त्याचा आयपी अॅड्र्रेस शोधला जात आहे. सगळ्या बाजूने याची चौकशी केली जात आहे, असे पोलीस अधिकाऱ्यांनी सांगितले. दरम्यान धमकी आल्यानंतर स्वतः एकनाथ शिंदे यांनी प्रतिक्रिया दिली आहे.

मला पोलीस आयुक्तांनी फोन केला. अशा अनेकदा धमक्या येऊन गेल्या आहेत. त्या धमक्यांचा विचार कधी केला नाही. मी माझं काम करतोय. पुढेही सुरुच राहणार आहे, अशी प्रतिक्रिया शिंदे यांनी दिली.

गृहमंत्रालयाकडून चौकशी सुरू आहे. यामागे कोण आहे, हे लवकरच समोर येईल, अशी प्रतिक्रिया शिंदेंचे पुत्र आणि खासदार श्रीकांत शिंदे यांनी दिली.