भोंदू अशोक खरात प्रकरणावरून दीपक केसरकर यांनी केलेल्या विधानानं उपमुख्यमंत्री आणि शिवसेनेचे प्रमुख नेते एकनाथ शिंदे नाराज असल्याची चर्चा सुरू असतानाच, शिंदे हे अचानक मुख्यमंत्री देवेंद्र फडणवीसांच्या भेटीसाठी गेले. काही वेळापूर्वीच शिंदे हे मुख्यमंत्र्यांचं निवासस्थान असलेल्या वर्षा बंगल्यावर पोहोचले. ही भेट नेमकी कोणत्या मुद्द्यांवर आहे, हे अद्याप कळू शकलेले नाही. या भेटीत आता काय आणि कोणत्या मुद्द्यांवर चर्चा होईल, याबाबत राजकीय वर्तुळात कमालीची उत्सुकता आहे.

राज्यात गेल्या काही दिवसांपासून बऱ्याच घडामोडी घडत आहेत. भोंदू अशोक खरातचं प्रकरण उघड झाल्यानंतर त्यात अनेक राजकीय आणि व्हीआयपी व्यक्ती अडचणीत आल्याचे बोलले जात आहेत. खरात प्रकरणामुळंच राष्ट्रवादी काँग्रेस अजित पवार गटाच्या नेत्या रुपाली चाकणकर यांना महिला आयोगाच्या अध्यक्षपदाचा आणि पक्षाच्या महिला प्रदेशाध्यक्षपदाचा राजीनामा द्यावा लागला होता. तर खरातसोबतचे फोटो व्हायरल झाल्यानंतर शिवसेनेचे दीपक केसरकर यांच्यावर आरोप झाले होते. त्यानंतर केसरकर यांनी माध्यमांकडे याबाबत स्पष्टीकरण दिले होते. ३९ आमदार भेटले असताना माझंच नाव का घेतलं जात आहे, असं ते म्हणाले होते. त्यामुळे आता ते ३९ आमदार कोण? अशी चर्चा राजकीय वर्तुळात सुरू झाली आहे. या सर्व घडामोडी राज्यात घडत असतानाच शिंदेंनी फडणवीसांची भेट घेतल्यानं अनेकांच्या भुवया उंचावल्या आहेत.