एकनाथ शिंदे आणि अमित शहा यांच्या भेटीत नेमकी काय चर्चा झाली? याबाबत संजय राऊतांनी खळबळजनक दावा केला होता. त्यावर राज्याचे मंत्री आणि शिवसेना नेते उदय सामंत यांनी जोरदार पलटवार केला आहे. शिंदे हे अमित शहा यांना भेटले तर तुमच्या पोटात का दुखतंय, असा सवाल सामंत यांनी विचारला आहे. तर राऊत यांचं भाकित खरं ठरतंय, असं ठाकरे गटाचे नेते भास्कर जाधव यांचं म्हणणं आहे.

काय म्हणाले उदय सामंत?

राऊत साहेब हे अंतर्ज्ञानी आहेत हे आज मला कळलं. जे बाकिच्यांना कोणाला कळत नाही ते त्यांना कळतं अशा पद्धतीने त्यांनी आज स्टेटमेंट केलं आहे. एकनाथ शिंदे जर अमित शहा यांना भेटले असतील तर यांच्या पोटात दुखण्याचं काहीच कारण नाही. यांच्या पोटदुखीवरचा उपाय आपला दवाखाना हा एकनाथ शिंदे यांनी सुरू केला आहे. एक महत्वाची गोष्ट आहे की एखादा फेक नरेटिव्ह कसा सेट करायचा हे यांना अचूक कळलं आहे. अमित शहांना जर एकनाथ शिंदे भेटले असतील तर त्यात वावगं काय आहे, असा प्रतिसवालही सामंत यांनी केला.

संजय राऊत यांचे म्हणणे खरे ठरते - जाधव

संजय राऊतांची अनेक वक्तव्ये मी सांगेल, त्यावर टीका-टिप्पणी केली आहे. त्यांनी केलेले वक्तव्य, त्यांनी केलेली टीका, त्यांनी दिलेली माहिती ही कालांतराने खरीच ठरलेली आहे. त्यामुळे आज संजय राऊत यांनी केलेले वक्तव्य कालांतराने खरे ठरण्याकरीता थोडी वाट बघूया, असं भास्कर जाधव म्हणाले.