चेकाळणे या शब्दाचा अर्थ गुगलवर जाऊन तपासा असा हल्लाबोल एकनाथ खडसेंनी भाजपवर केलाय. महाराष्ट्रात राहून मराठीचा अर्थ समजत नसेल तर त्यांच्या बुद्धीची कीव येते असंही खडसे म्हणाले. रूपाली चाकणकर चेकाळून बोलत आहेत असं विधान खडसेंनी काल केलं होतं. यावरून विरोधकांनी त्यांच्याविरोधात आंदोलन सुरू केलं होतं.

खडसे काल काय म्हणाले ?

रुपालीताई चेकाळल्या का? कारण रुपालीताई आणि रोहिणीताईंचे किती मैत्रीपूर्ण संबंध आहेत हे तुम्हाला माहीत आहे. त्यामुळे रुपालीताई इतक्या चेकाळून बोलत आहेत. तर त्यांनी सत्य ते बोलावे त्याबद्दल दुमत असण्याचे कारण नाही. पण यासंदर्भात मी जावयाचं समर्थन करणार नाही, असे खडसे म्हणाले होते.

खडसे आज काय म्हणाले?

रुपालीताईंचा उल्लेख मी १३ वेळा केला. अनुल्लेख केला नाही आणि दोन वेळा सांगितलं की चेकाळल्यासारखं बोलतात. गुगलवर जा आणि मराठीचं भाषांतर बघा. चेकाळणे याचा अर्थ आवेश, बेफाम होणे, भडकणे असा होता. चेकाळणे या शब्दाचा मराठी अर्थ खवळणे, चिडणे आणि संतापणे असा होतो, असं खडसे आज त्यावर म्हणाले.